革命

3月26日晚~

哇哈哈哈哈~

我革命終於成功喇~

我可以食我想食好耐嘅魚仔餅喇~

無得食海鮮，食下魚仔餅解下心情啦~

有蟹有魚有海星~哈哈~

 

3月27日 LUNCH~

今日食君滬鍋貼大王

http://www.openrice.com/restaurant/sr2.htm?shopid=15656&tc=sr1 

 我食生煎豬肉包~碗仔翅~鍋貼~饅頭~

個生煎豬肉包好大隻

但我覺得OK喎，係個餡搞笑啲囉

我一咬，個餡就跌左出嚟...

個碗仔翅我恨左好耐喇~

我成日想食，但老公又唔想我食~

今次可以明正言順食喇~

好足料嫁，肉絲、木耳、粉絲、蛋

總之就好啱我胃口啦~

因為我想食嘛~XD~

3月28日LUNCH~

今日食輝記雲吞麵

http://www.openrice.com/restaurant/sr2.htm?shopid=20235&region=0&s=3 

 我食鮮牛肉魚蛋粉加生菜

一個餐嚟嫁

湯佢係另外用杯裝，

唔會送到嚟就索哂啲湯

呢個好GOOD~

魚蛋唔算彈牙

但果兩塊魚片又OK彈喎！

鮮牛肉唔會拿都無味，都OK

今個星期好大食...

我唔敢上磅呀！

我怕一上磅嚇親自己...

 

肉酸

早排天氣凍，

所以基本都著樽領衫，

一啲都唔會發覺.....

今日天氣熱喇！

我可以著啲開領衫，

但...唉....

心口生哂粒粒...

一點點紅印....

好肉酸呀....

尋晚食晚飯前已經有啲啲胃痛...

食完飯之後仲痛...

成晚拿住拿住...

今朝都仲有少少唔舒服....

外星

我間唔中會同我老公講啲外星話，

佢有時好醒，一估就中，

有時就~XD~

例如我同佢講"我食緊啤住你~"

哈哈~應該都幾難估~佢當然的唔明~

我係講緊"我食緊啤豬梨~"XDD~

今日LUNCH好唔健康！XD~

我叫呢間茶餐廳~

http://www.openrice.com/restaurant/sr2.htm?shopid=42074&region=0&s=3 

食三寶飯~

即係餐肉、火腿煎蛋飯~

煎雙蛋，生生哋可以有蛋黃撈飯

餐肉、火腿一般

啲豉油汁....我叫多汁，個阿姐話多色，好！

真係得色....無味.....

不過都叫做夠平，一個飯有杯熱檸水，

都係$32蚊，已經叫做好抵食！

今日公司個冷氣壞左漏水，

地下成灘水，

即刻關冷氣，

但搞到公司好焗，

我即刻唔舒服，

呢個夏天都唔知點捱....

食粥

今日午餐去左買粥食~

粥滿家~晌新蒲崗錦榮街~

連OPENRICE都搵唔到嘅新粥舖 

我食牛肉粥~

個粥都OK呀，好足料好多牛肉~

個粥底就一般粥舖果啲，無咩特別！

其實我淨食粥唔夠飽！

我同同事又三個人食，所以仲買左其他嘢SHARE~

有炒麵、齋腸、油炸鬼~

首先油炸鬼，雖然唔係新鮮炸，但仲好脆口！GOOD~

炒麵同齋腸都係一早整定，可能LUNCH多人做唔切呱~

我覺得普普通通！

回顧返我的懷孕期，

原來我口味都變得幾多！

但除左口味變左之外，

我又無咩特別咁，

不過皮膚真係好痕！！

同埋條腰無左....

短短半年...

我結婚時條腰23-24寸.....

唉....生完先算.....

 有張相係肥仔B，

真係無次見到都笑餐懵！

因為係大師級傑作！

肥B的梯田！XD~XD~XD~

 

 

 

操剪

星期六(2014.03.22)

我老公親自操剪，幫肥大B剪個新轆

剪毛前嘅傻仔轆

剪毛前，條友仔又真係好鬼C多毛嘅...

老公毫不留手咁剪...剪到咁....

 我真係覺得慘不忍到...但我老公完全唔比我掂把較剪...為有靠把口叫佢要點修點修...好彩...

都總算修返整齊....

大B︰我真係無眼睇呀...成個月都唔駛出街喇我！

大B︰剪完毛毛係咪有獎賞嫁？

因為大B有關節炎，我唔想食飯時佢跳來跳去，所以...

呢個皇庭啱哂佢~HEHEHEHE~

今日(2014.03.24)

已經第15週喇，我開始多左唔舒服

胃成日頂住頂住，食多少少就胃痛

腰近股骨位亦痛左好多

坐底起身最痛

唔知大肚婆可唔可以去揼骨嘅呢...

啲皮膚亦係重災區

面瘋狂爆瘡

身都有好多粒粒

到底仲要維持幾耐呀...

伙食

我公司以前做廠，所以到依家都仲係包伙食

近排我哋好經常叫呢間外賣

 http://www.openrice.com/restaurant/sr2.htm?shopid=148542&tc=sr1

 今日食左個焗葡汁豬柳飯

今次我覺得真係嘛嘛喇！

我上次食個焗鴛鴦柳飯，

佢係豬柳加魚柳，

個豬柳厚切好juicy好淋，

所以今次先叫焗葡汁豬柳飯，

點知中伏了.....

又乾又硬....

一啲都唔好食....

係多芝士多汁，都叫可以送下飯....

但下次都係咪制.....

我尋日下午已經開始覺得肚脹好唔舒服

點知夜晚食完飯仲脤啲

又頂住個胃

成晚都唔舒服

仲不停放屁...

真係醜怪....

好彩今朝起身無事喇....

唔係我今日就唔返工休息下喇！

午餐

我近排好想好想食辣嘢~

於是乎尋日午餐去左食韓國嘢~

好搞笑~

我原本係完全唔食得辣的人，

自從有左之後，

我好想食辣，

但都唔敢食，

尋日一食....

大件事喇！我完全唔覺得辣嘅？

口味改變左咁多？

韓食家純豆腐麵店 

尋日就係去左呢間︰韓食家純豆腐麵店

啲食評嘛嘛地，但我唔覺咁差喎！

我叫左"純豆腐辣湯-牛肉"

有辣牛肉湯、有飯、有泡菜、仲有嘢飲

首先，個辣牛肉湯，我個人覺得好ok喎！

個味道同我晌韓國食嘅一定有分別，

佢無咁辣，遷就左香港人口味

但上枱時仲滾緊，夠晒熱辣辣，

豆腐亦好夠滑，利申！我本身鍾意食滑豆腐！

 個泡菜就一般喇！但都不過不失！

飲品可以選擇是日餐湯或氣水，

加錢可以轉特飲，

我加左6蚊轉熱柚子蜜，

一般即沖果啲，但佢唔會沖到好淡，佢好夠味！

整體我都覺得唔差嫁！

下次要再去試石頭鍋飯！

我未有BB之前日日飲一杯咖啡嫁...

自從有左之後一杯都唔敢飲...

我好掛住我杯醒神啡呀！

小心

尋晚 (2014-03-18)

我差啲嚇暈我老公~XD~

事緣係咁︰

我老公收工去左我阿媽屋企，

處理工人姐姐懶散問題，

而我就自己返屋企，

我如常沖涼、食完飯就返房睇電視，

問題就晌呢到發生，

我睇睇下電視開始覺得唔舒服，

咪嗱嗱淋瞓覺唔睇囉，

點知一瞓底就開始有啲呼吸困難，

仲覺得有啲啲暈，

我無理佢繼續瞓，

我老公返到返，一見我瞓左，

又聽到我好大抖氣聲，

就問我係咪唔舒服，

我果下唔知瞓到半夢半醒定真係有啲暈，

我答唔出聲，

醒左陣，抖左陣，先答到佢，

佢叫我起身坐下，但我起身又係唔舒服，

跟住我叫佢拎個血壓計幫我量一量，

我自從有左之後上壓都KEEP住115-125左右，

尋晚量上壓得返94，唔怪之得我咁唔舒服啦！

好好彩，我抖抖下又瞓著左，

跟住今朝就無事喇，

不過我下次真係要小心啲，

一有唔舒服要即刻搵老公先得~XD~

不適

今日我老公會自己一個返我阿媽到，

要同工人姐姐傾傾

因為佢開始懶散！

但佢唔比我跟埋返去

話出出入入辛苦，又夜返....

但我好掛住大B嫁嘛....

呢兩日都覺得肚脹脹

仲有少少好似M到咁痛，到底有無問題呢？

唔覺唔覺就3個半月喇

越嚟越覺得個肚大得快

依家已經唔可以著貼身衫喇

因為個肚開始明顯喇

今日收到診所打電話嚟，

初期唐氏綜合症報告出左，低風險，無問題

地中海貧血報告都出埋，都係低風險，無問題

YEAH~安樂哂~

報告

2014-03-14 星期五

我收工入到屯門已經8:15，即刻去PIZZA HUT攞位！

點知都等到9點先有位，一坐底就急不及待叫嘢食！

我哋兩個人，叫左︰

芝士七重奏PIZZA二人套餐

兩個餐湯，一紅一白

細嘅菠蘿煙燻豬肉芝士七重奏PIZZA

肉醬意粉

兩杯餐飲

仲可以優惠價27.5加脆雞棒伴瘋薯條

兩個人就係叫左咁多嘢！

之前都話成9點先坐底

兩個餓鬼嘢食一嚟就開餐~都唔記得手機先食~HEHEHE~

好喇，介紹下個PIZZA先！

首先批邊巴馬臣芝士脆脆，熱辣辣時口感香脆，凍左都仲KEEP住脆

加上7種香濃芝士，

包括Parmesan巴馬臣芝士、

Mozzarella水牛芝士、

Romano Cheese羅馬諾芝士、

Provolone布旺倫芝士、

Monterey Jack蒙特里傑克芝士、

Cheddar車打芝士及Cream Cheese忌廉芝士 

老實講，芝士太多，我唔係好分到有咩分別

但每一件批面有一大粒我估係水牛芝士，好濃濃嘅芝士味

鍾意芝士如我呢啲人就覺得，真係好好味！

兩個餐湯，一紅一白 - 普普通通啦！

肉醬意粉 - 我個人覺得油左啲，食到尾個盤或仲一層油...

脆雞棒伴瘋薯條 - 雞乾左啲，薯條一般

整體個PIZZA我覺得GOOD嘅，其他一般

2014-03-16 星期日

我返左阿媽到

因為阿媽話新山唔過舍，要清明前一個月拜老豆

所以我同老公一早起身就返去

但因為我有左，唔可以去拜

只係我老公同我阿媽去拜

我留守屋企睇住肥大B

之前阿媽已經講左比我知

肥大B成日慘叫

我見到佢，瞓晌到又叫，坐晌到又叫

唔理喇！同佢見左醫生先講啦！

就係咁....又花左我二千多個大洋...

一去到診所，隻肥仔仲驚驚青青~XD~

 睇完醫生就安樂哂喇~

 

驗左血，驗血報告好靚仔~

前列腺照左超聲波，都正常~

咁點解佢哎得咁慘豬呢？

原來...兩隻後腳都關節炎....

之前就兩隻手，依家兩隻腳，四蹄都關節炎=_="

大左

HAPPY FRIDAY~

今日星期五喇~仲係白色情人節添呀~

不過我老公要去飲囍宴，我為有....

自己約朋友啦~啦~啦~

約左朋友今晚去食PIZZA HUT~

我好想試下個芝士七重奏呀~

唔知好唔好味呢~

等我今晚食完~

寫返份詳細嘅REPORT啦~

今日著衫，發覺我個肚大左好多呀！

唔知會唔會係錯覺呢？

我成日叫我老公幫我影相，記錄底個肚大得有幾快嘛！

有時都唔明啲男人~

就係唔想做，要拖，拖到無得拖時，都係拖...

佢都係仲未肯幫我影...

我自己又唔識自拍...超低能...

次次拍親唔係歪就蒙...

算數啦...為有再催下個男人啦...

檢查

今日做早期唐氏綜合症檢查

今日見到個B好精靈,仲好百厭

沃得好厲害,彈下彈下

手腳又不停撐

仲轉來轉去

問左醫生男定女

醫生話都仲未肯定

但好大可能係女~

又痛

尋晚頭又痛喇...

而且仲痛過前一晚...

今朝都仲痛緊...

搞咩呀...

呢兩晚已經好早瞓...

而且又瞓到天光，都瞓得唔錯...

點解會痛嫁...

聽日去覆診問下醫生先！

睇返早兩年去旅行啲相...

我真係好想好想好想去旅行呀...

老公答應帶我去澳門...

但好似無哂下文咁...

都唔知真定假...

唉...等下啦...

日記

尋晚有少少唔舒服呀..

我本身個人身體比較虛弱..

一病就成個星期...

一咳就更慘，要成個月先止咳...

尋晚突然間有兩聲咳，又頭痛...

唔知係咪轉天氣而凍親...

但我尋日已經扎糭咁返工...

又無吹過風...

呢段時間要好小心先得嫁，唔可以病嫁...

病左唔可以食藥，會好辛苦...

所以尋晚早早未夠十點就瞓左lu...

好彩今朝起身無事啫~

依家個肚腩未算凸，好多時啲人都唔會為意我有左..

今朝搭巴士返工，上車時後面個大嬸見我行得慢不停推我..

真係好討厭！大家排隊上車，慢少少又唔會少個位，推咩啫！

我另轉面叫佢唔好推，推跌我佢就麻煩，佢繼續推仲想開口鬧我添呀！

我即刻話大肚婆妳都仲推，推夠未呀！

佢先肯收手咋...

咁急趕就早啲起身嘛！點解要咁樣推人先安樂嫁！

開心

(20140308)星期六一早去醫院排期

醫院好多人，仲有人無住址證明就發癲話醫院唔比佢生仔=_="

無左雙非，但第一次產檢都要排到5月15日...好漫長....

真係無錢去私家做檢查的家庭...要生仔有咩事都唔知點好....

排完期就返左屋企陪大B玩~睇下佢個開心樣~

哥哥仲幫大B剪手仔腳仔啲底毛，但....剪得好肉酸囉.....

 

臨走前幫大B換返件厚啲嘅衫，呢兩日凍呀！唔好凍親呀！

想念

有左之後因為媽咪屋企我唔方便返去過夜

少左好多時間陪大B

我知大B好悶，我都好想返去

但無地方瞓，夜走我返返屋企又遠

依家只可以每個星期六都早啲返去

攬下佢，摸下佢，掃下佢

我見佢個樣成日都苦瓜乾

少左笑

我知我少左陪佢，佢唔開心

大B，我答應你，我生完之後會多啲返嚟陪你嫁！

 

玩具

上年買左部家用激光脫毛機
Panasonic ES-WH70-PN
http://www.nagisahouse.com/product.asp?CategoryID=32&id=5870

都未用就已經壞左

拎返去整，整到依家先比得返我

一心諗住正啦！可以唔駛再煩喇！

點知......

個盒上面寫明......

孕婦不適宜使用........

天呀....點解咁對我呀.....

之前買左部洗面機已經寫明孕婦唔用得而放埋一邊發霉嫁啦....

依家呢部又唔用得.....

咁我仲有咩玩具玩得呀.....

我老公又唔比我抱大B.....

同大B玩癲啲又唔得.....

我唔制呀.....

忍耐

介口介到好難頂

由知道有左開始，我老公就列左張水蛇春咁長的禁食清單比我

我係蝦怪，依家無得食蝦....

薯條平時一般我麻麻地，有左之後勁想食....

魚，我不嬲怕骨怕鯹，有左之後餐餐想食魚，食到我怕但都仲係想食....

蟹我間唔中都會食，唔係好好，但都鍾意食，又係唔食得....

 海鮮，鮑魚、蜆、貝、帶子、象拔蚌....我通通諗多左....

有左之後，我覺得自己好恐怖....

我可以不停食嘢，食好多嘢....

但都仲係好肚餓.....

係咪個個都係咁嘅呢？

定淨係我特別啲呢？

仲有就係，個身好痕.....

無論我查幾多lotion幾多潤膚油都好

我總係好似海綿咁索哂...

然後....繼續好痕....

開始

我好想大聲講~

我今日有左三個月喇~

回想呢段時間~

見人就比人問我，係咪有左呀妳？

我一直迴避~

我有濕疹呀~所咪剪短頭髮囉！

我腰骨扭親呀~所以咪唔抱得大B囉！

講完自己都覺得好笑~XD~

都唔知啲咩理由嚟嘅！

我今次真係覺得我好好彩呀！

我好好胃口~完全無嘔~(Touch Wood！)

除左甩頭髮多左啦，濕疹勁左啦，個人怕凍左啦，又容易攰左啦~之外

基本上就無咩問題~

但3個月咋....我已經重左10磅喇....會唔會肥得太快呢.....wowowo=_="

我原本有心律不正的問題，對懷孕其實都有啲影響...

由知道有左開始，我老公就勁緊張，呢樣唔比，果樣唔準....

搞到我好無引....

好想同佢講，我有左啫，小心啲咪得囉....比返啲自由我得嘛.....

不過我又好開心嘅，因為佢緊張我，先會有咁樣嘅行為啫~

下星期要去覆診，要做初期唐氏綜合症檢查...

 我最怕抽血.....

希望順利無事啦...